Stuðulspolitikkur
Høvuðsendamálið hjá Atlantic Airways er at knýta Føroyar nærri umheiminum við einum tryggum, búskaparliga burðardyggum, fjølbroyttum og altjóða kappingarførum loftvegis sambandi við útheimin.
Sum virkin luttakari í samfelagnum stuðlar felagið eisini bæði bólkum og einstaklingum. Stuðulsveitingar eru fyri okkum ein íløga, og tí vilja vit fegin hava nakað afturfyri stuðulin. Vit stuðla ítróttini og mentanini, tí vit halda, at samfelagið eigur at hava eitt sunt og fjølbroytt mentanar- og ítróttalív. Vanliga stuðla vit landsliðum heldur enn lokalum liðum, eins og vit vilja lívga um góð talent, sum kunnu gera vart við seg og Føroyar uttanlands.
Allar umsóknir skulu vera skrivligar. Í umsóknini skal greitt koma fram, hvat endamálið er við tiltakinum, hvat stuðulin skal nýtast til, og hvat Atlantic Airways fær afturfyri.
Av tí, at Atlantic Airways hevur avmarkaða fíggjarorku, er játtanin til stuðul sjálvsagt avmarkað, og tí má hvør stuðulsumsókn viðgerast gjølla, og øll fáa skrivligt svar. Verður umsókn um stuðul send minni enn ein mánað áðrenn tiltakið, verður sæð burtur frá umsóknini.
Umsóknir um stuðul til tiltøk og annað kunnu sendast til sponsor@atlantic.fo
Vit vísa eisini til Loftbrúnna til listafólk, sum er eitt samstarv millum Norðurlandahúsið í Føroyum, Tórshavnar kommunu, Atlantic Airways og Mentamálaráðið.
Endamálið er at breiða kunnleikan um føroyska mentan í útlondum við at stuðla dansarum, filmsfólkum, myndlistafólkum, rithøvundum, sjónleikarum, tónleikarum og øðrum við loftvegis flutningi til útlond og aftur í sambandi við verkætlanir ella tiltøk uttan fyri Føroyar.
Les meira um Loftbrúnna HER
Uml. hálvan februar-hálvan mars á hvørjum ári ber til at søkja um peningaligan stuðul úr Listaflogi. Kunnað verður nærri hvørt ár, nær til ber at søkja, og nær freistin er.
Til ber at søkja um upp til 125.000 kr. Tú søkir við at taka umsóknarblaðið niðanfyri niður og fylla tað út. Umsóknarblað og fíggjarætlan eru kravd, og tú ert eisini vælkomin at viðhefta onnur viðkomandi skjøl. Hetta skal alt sendast til listaflog@atlantic.fo
Tak umsóknarblaðið til Listaflog niður HER.
Viðtøkur fyri stuðulsskipanina Listaflog
§ 1 Eigari
Navnið á stuðulsskipanini er “Listaflog”; eigari er P/F Atlantic Airways.
§ 2 Endamál
Málið við “Listaflogi” er at stimbra føroyska list fíggjarliga og við ferðaseðlum á rutunetinum hjá Atlantic Airways í sambandi við listaligt arbeiði og/ella ávísa listaverkætlan.
§ 3 Nevnd
Skipanin verður stjórnað av einari nevnd, mannað við:
- Einum umboði fyri nevnd og leiðslu í Atlantic Airways
- Einum umboði fyri Listafólkasamband Føroya
- Einum umboði, sum Mentamálaráðið velur
- Einum skrivara/samskipara, sum Atlantic Airways velur.
Nevndin verður vald fyri tvey ár í senn.
Nevndin hevur fulla heimild at velja, hvør ella hvørjar av innkomnu umsóknunum verða gingnar á møti, og hvussu peningurin verður býttur millum umsøkjararnar.
§ 4 Upphædd
Stuðulin, sum er 125.000 DKK tilsamans, verður latin 28. mars á hvørjum ári, sum er dagurin, tá ið Atlantic Airways fór á flog á fyrsta sinni. Umsóknir skulu sendast sambært umsóknarskjali, sum er tøkt HER
§ 5 Stuðulin
Stuðulin kann vera latin einum ella fleiri listafólkum og/ella listaverkætlanum. Stuðulin kann, umframt pening, eisini fevna um ferðaseðlar á rutunetinum hjá Atlantic Airways í sambandi við verkætlanina – í mesta lagi fimm ferðaseðlar aftur og fram. Grundgevast skal fyri, hví ferðin hevur týdning fyri verkætlanina.
Stuðul verður latin til listafólk, ið hava útbúgving ella aðra fakliga viðurkenning og arbeiða heilt ella partvís sum yrkislistafólk.
Stuðulin verður latin sambært galdandi skattareglum.
§ 6 Treytir
Fyri at fáa stuðul, skal listafólkið búgva í Føroyum ella vera føroyingur búsitandi uttanlands.
Listafólkið skal kunna vísa á, hvussu stuðulin skal brúkast, og eisini skal Listaflog áðrenn 28. mars árið eftir móttaka eina frágreiðing (skrivliga, myndir, video osfr.) um, hvussu stuðulin varð brúktur.
Fíggjarætlan skal fyriliggja.
Umsókn um stuðul skal vera okkum í hendi í tíðarskeiðnum fyrst í februar til hálvan mars á hvørjum ári, sum stuðulin verður latin 28. mars. Felagið kunnar alment, nær klárt er at taka ímóti umsóknum og hvussu leingi. Umsóknir, sum koma uttanfyri nevnda tíðarskeið, verða ikki tiknar við.